دملګرو ملتونو لخوا دخېبرپښتونخوا سيلاب ځپليو سيمو کښې دکوټلې مرستې عزم

پېښور( وحدت خبر) د خيبر پښتونخوا وزيراعليٰ علي امين خان ګنډاپور سره د ملګرو ملتونو يو   وفد  د جمعې په ورځ اسلام اباد کښې وليدل  په دې   وفد کښې د ملګرو ملتونو د پاکستان   لاپره  دملګرو ملتونو ريزيډنټ کوارډي نيټر  محمد يحييٰ، د يو اين ريزيډنټ کوارډينيټر افس  مشرې افکې بوټسمن، اوديونائيټډ نيشنز افس فار کوارډي نيشن اف هيومنيټيرين افيئرز مشر کارلوس ګيها شامل وو.  په دې ليدنه کښې د خيبر پښتونخوا حکومت او ملګرو ملتونو ترمنځ  دشريک کار په نور پراخه کولو، پرمختيائي   منصوبو او   اؤ دخپل مينځي دلچسپۍ په امورو   خبرې وشوې. د دې ليدنې  پۀ وخت  دواړو خواوو د همکاريو د لا پراخولو، د سېلاب ځپلو د بحالۍ لپاره پۀ ګډو اقداماتو او مرستو  اتفاق وکړے شو. وفد  د خيبر پښتونخوا له وزيراعليٰ سره د وروستيو سېلابونو له امله د زيانونو په اړه خواخوږي او تسليت څرګند کړو. وزيراعليٰ   وفد ته ووئيل، چې د خيبر پښتونخوا اته  ضلعې له وروستيو بارانونو او سېلابونو په سبب  سختې اغېزمنې شوې دي. په دې پېښو کښې تر ۴۰۰ زيات کسان مړۀ شوي او تر ۲۴۰ زيات ژوبل شوي دي. همداشان ، ۶۶۴ کورونه مکمل ړنګ شوي، او ۲۴۳۱ ته جزوي زيان رسېدلے. ښوونځي، د صحت مرکزونه، سړکونه، او د څښاک اوبو سيسټم هم سخت خراب شوے دے. وزيراعليٰ ووئيل،   متاثره کسانو ته  دفوري ريليف فراهمۍ  نه پس   دمرګ ژوبلې اؤ مالي نقصانونو دمعاوضې په ادائيګۍ  کار شروع کړے شوے دے.   . د مړو  معاوضې  د ۱۰ لکو نه ۲۰ لاکو ته لوړې  کړے شوي  ، د ژوبلو  معاوضې  له دوه نيمو لکو  نه  ۵ لکو ته، د مکمل ړنګ شوو کورونو   معاوضې له ۴ لکو  نه   ۱۰ لکو ته، او د جزوي زيانمنو کورونو   معاوضې  له ۱ لک   نه  ۳ لکو ته لوړې  کړے شوي دي. هغه زياته کړه، چې په اول ځل دتباه شوو دوکانونو دمالکانو لپاره پينځه لکه معاوضه ټاکل شوي او هغو دوکانونو لپاره چې سېلابي اوبه ور ننوتې وې، د صفايۍ لپاره  ئې يو لکه روپۍ  مقرر کړے شويد.   ددې نه علاوه صوبائي حکومت د د فصلونو، باغونو او  څارويو د  زيانونو لپاره هم  دمعاوضې ورکولو فيصله شوې ده. علي امين ګنډاپور ووئيل چې  د  معاوضې  ورکولو لپاره ډيجيټل پيمنټ سيسټم  رائج کړے شوے دے  او د روانې اوونۍ تر اتوار پورې به ټولې  ادائيګۍ   وکړے شي.  هغه وويل، هغو   کم عمره  ماشومانو ته چې هيڅوک ئې ژوندي نه دي پاتې، د  معاوضې پيسې به د   متعلقه ډپټي کميشنر له لارې په ځانګړو  اکاونټونو کښې جمع شي.  صوبائي حکومت دسيلاب متاثرينو بحالي اؤ ريليف اؤ ادائيګيو کښې  سل فيصده  شفافيت يقيني کوي،  متاثرينو ته په وخت دريليف فراهمۍ اؤ دبحالۍ کارونو موثره نګرانۍ لپاره اضافي افرادي قوت فراهم کړے شوے دے.   وزيراعليٰ وويل، چې په متاثره سيمو کښې اضافي طبي عمله،موبائيل ميډيکل   يونټونه تعينات کړے شوي اؤ  دصحت   مرکزونو ته  ضروري   دوايانې هم ورکړل شوي دي. د امدادي چارو د څار لپاره د کابينې غړو د متاثره سيمو دورې کړيدي ، او زه خپله هم بونير، سوات او صوابۍ ته تللے يم اؤ دنقصانونو اؤ امدادي کارونو جائزه مې اخستې ده.  دۀ ووئيل زما هڅه دا ده چې متاثره خلق ز ر تر زره بېرته پخپلو پښو ودروم، او زيانمن شوي انفراسټرکچر زر تر زره بېرته جوړ کړو. اوس د متاثره ضلعو د سړکونو، څښاک اوبو، او د صحت مرکزونو د بيا رغونې پړاو پيل شوے دے. چيرې چې د اوبو نظام خراب شوے، هلته واټر فلټريشن پلانټونه لګول شوي دي. وزيراعليٰ وويل، هڅه کوو چې هغه خلق چې دايمي ډول له سېلابونو سره مخ دي، محفوظو سيمو ته انتقال کړو. علي امين ګنډاپور وويل، چې سربېره پر عاجلو اقداماتو، صوبائي حکومت دايمي حل لټوي. د کلاوډ برسټ له امله متاثره سيمو کښې پۀ غرونو د جالونو  لګولو منصوبه بندي کيږي، او مناسب ځايونو کښې واړه بندونه او چيک ډيمونه جوړوو. دملګرو ملتونو لخوا دخېبرپښتونخوا   دسلاب ځپليو بحالۍ کښې دکوټلې همکارۍ عزم څرګند کړے شوے دے.