کوهاټ کې ديو اين ايچ سي ار پناه غوښتونکې کورنۍ له سختو ستونزو سره مخ دي

کوهاټ (نعمت الله خان)

د کوهاټ په بېلابېلو سيمو کې د افغان کډوالو پر ضد روانو عملياتو نوې څپه اندېښنې راپارولې دي، چيرته چې ضلعي چارواکو د کډوالو په پنډغالو او غير رسمي مېشت ځايونو کې د کورونو نړولو لړۍ پيل کړې ده. د دغو عملياتو په ترڅ کې هغه افغان کډوال هم اغېزمن شوي چې د ملګرو ملتونو د کډوالو عالي کمېشنرۍ (UNHCR) له خوا د درېيم هېواد لپاره د پناه غوښتنې سندونه (Asylum Seeker Certificates) لري.

د ځايي سرچينو له مخې، د کوهاټ په درېيم کډوال کمپ کې د يوې پناه غوښتونکې کورنۍ کور هم نړول شوي دي. د کورنۍ مشر زاهد جان وحدت نيوز ته ويلي چې د دوي د کور دېوالونه ړنګ کړل شوي او اوس يې د کورنۍ غړي له سخت ذهني فشار او نامعلوم برخليک سره مخ دي.

زاهد جان وايي، دوي نه شي کولاي بېرته افغانستان ته ستانه شي، ځکه چې هلته د امنيتي ګواښونو او نورو جدي ستونزو سره مخ دي. هغه زياتوي چې د ده کورنۍ له کلونو راهيسې په پاکستان کې مېشته ده او اوس د ناڅاپي اقدام له امله بې سرپناه شوې ده.

نوموړي د پاکستان له حکومتي چارواکو او د ملګرو ملتونو له اړوندو ادارو غوښتنه کړې چې د دوي حالت ته جدي پام وکړي او تر هغې چې د درېيم هېواد لپاره د دوي د کډوالۍ دوسيه بشپړه کېږي، ورته په موقتي توګه د پاتې کېدو اجازه ورکړي.

بلخوا، ځايي چارواکي وايي چې دا عمليات د غير قانوني ودانيو او ناقانونه مېشتو کډوالو پر ضد دي چې د قانون  پلي کېدو لپاره ترسره کېږي.

د يادونې وړ ده، په دې وروستيو کې د خيبر پښتونخوا په بېله بېلو ولسواليو کې د افغان کډوالو پر وړاندې د فشارونو زيات شوي او د بېرته ستنېدو ورته امر شوي چې له امله يې ګڼې کورنۍ د بې ځايه کېدو او ناڅرګند برخليک سره مخ دي.