د ایران د وسلهوالو ځواکونو لوړپوړي قومندان د احتمالي ځمکنۍ حملې د خطر په نظر کې نیولو سره پوځ ته سختې لارښوونې کړې دي.
د راپور له مخې، د ایران د پوځ د عملیاتو قومندان چیف امیر حاتمي په یوه لوړپوړي پوځي غونډه کې د وینا پر مهال عملیاتي قرارګاوو ته لارښوونه وکړه چې د دښمن پر خوځښتونو ډېر نږدې او دقیق نظر وساتي او هره شېبه له وضعیت څخه خبر واوسي.
هغه پوځي قومندانانو ته هم وویل چې د امریکا او اسراییل فعالیتونه په دوامداره توګه وڅاري، څو د هر ډول احتمالي ځمکنۍ حملې په صورت کې سمدستي او اغېزمن ځواب ورکړای شي.
ایراني قومندان په سختو ټکو کې وویل چې که دښمن د ځمکنۍ حملې هڅه وکړه، نو پرې به پیاوړی ځواب وشي او برید کوونکو ته به د بېرته تګ هېڅ فرصت ورنه کړل شي.