د کوهاټ ډپټي کمېشنر ويلي، پوليو ويروس به د ولس په ملاتړ سره ختمولی شي

کوهاټ ( نعمت الله خان )

په کوهاټ کې د پوليو يا ګوزڼ ويروس د ملي کمپاين په تړاو ډپټي کمېشنر په مشرۍ کې د ضلعي چارواکو غونډه ترسره شوې.

يادې غونډې ته د کوهاټ ضلعې ډپټي کمېشنر رحيم الله مسيد ويلي، د پوليو پېښې زياتېدل د ماشومانو پر وړاندې جدي ګواښ دی، دغه ويروس پر وړاندې مبارزه کې د ولس ملاتړ اړين دی بايد چې والدين د ګوزڼ ويروس پرضد کمپاين مهال د روغتيا ټيمونو سره مرسته وکړي او تر پنځه کلنۍ کم عمره ماشومانو ته هرمرو د ګوزڼ دوه څاڅکي واکسين ورکړي.

نوموړي په خپل دفتر کې ګوزڼ ويروس پر ضد په را روانه مياشت اکتوبر له 13مې نېټې څخه پلېدونکی څلور ورځني کمپاين په اړه د کوهاټ روغتيا چارواکو او د ضلعې اړوند محکمو مشرانو سره د کمپاين پر چمتوالي بشپړ خبرو کې زياته کړې ده، په هر حال کې به هڅه کوي په ضلع کې تر پنځه کلنۍ کم عمره ماشومان ته د ګوزڼ ضد واکسين ور ورسوي. 

دی وايي، هېڅ کوم ماشوم د کمپاين پر مهال پرته له واکسينو پاتې نه شي.

ده د کوهاټ ضلعې له ولسه هم غوښتنه وکړه چې د کمپاين مهال د روغتيا ټيمونو د ملاتړ وکړای شي او والدين د خپل ماشومان واکسين کړي چې له دغې ساري ناروغۍ وژغورل شي او په راتلونکي له معولوليت څخه غوندي پاتې شي.

د روغتيا نړيوال سازمان ( ډبليو اېچ او ) او په پاکستان د روغتيا ملي انسټيټوټ ( اېن ای اېچ ) راپورونو له مخې په دغه روان کې د پوليو ويروس 23 مثبتې پېښې ثبت شوي دي.

په ګرده نړۍ کې پاکستان او افغانستان هغه دوه يوازيني هېوادونه ګڼل کېږې چې لا هم پکې ماشومان د ګوزڼ په ويروس اخته کېدو سره يې ژوند د تل لپاره په معلوليت بدلېږي.