دججانو ميډيا سره په خبرو پابندي مناسب نۀ ده، جوډيشل کونسل ته خط

 د سپريم کورټ ججانو، جسټس منصور علي شاه او جسټس منيب اختر، لخوا سپريم جوډيشل کونسل ته يو  خط ليکل شوے دے چې اوس مخې ته راغلے دے۔ د دې ليک په حواله ويلي شوي چې ججانو باندې د ميډيا سره د خبرو بنديز مناسب نه دے، ځکه چې په عصري جمهوري هيوادونو کښې ججان د عدالتي اصلاحاتو او اړونده مسائلو په اړه ميډيا سره خبرې کوي۔  د ډان نيوز د رپورټ له مخې، دا ليک د 17 اکتوبر په ورځ د ججانو د رويې کوډ (کوډ آف کنډکټ) کې د وړانديز شويو بدلونونو په تناظر کښې سپريم جوډيشل کونسل ته لېږل شوے و۔  په ليک کښې ويل شوي چې مونږ د جوډيشل کونسل د غونډې نه يوه ورځ مخکښې خپلې تبصرې د غونډې په شروع کښې جمع کړې وې، مونږ د ويډيو لينک له لارې په غونډه کښې ګډون کړے و، او د خراب انټرنيټ باوجود مو خپل دريځ وړاندې کولو هڅه وکړه۔ ليک زياتوي، مونږ دا خبره يقيني کړې وه چې د لاسليک شوې نسخې کاپي به د 20 اکتوبر په ورځ د غونډې وروسته جمع شي۔ خو د قومي عدالتي پاليسۍ جوړوونکې کمېټې د ناستې نه وروسته، چې پکښې غير آيني اقدامات مخې ته راغلل، مونږ خپل لاسليک شوے رسمي ليک لېږو۔ په ليک کښې دا هم ويل شوي چې د جوډيشل کونسل له ناستې يوه ورځ مخکښې د قومي عدالتي پاليسۍ کمېټې په غونډه کښې د ججانو د رويې کوډ (کوډ آف کنډکټ) موضوع غير آيني ډول   تر بحث لاندې راوستل شوې وه، حال دا چې دا موضوع يوازې د سپريم جوډيشل کونسل د اختيار لاندې راځي۔   په ليک کښې دا هم ويل شوي دي چې د اسلام‌اباد هائي کورټ چيف جسټس سردار محمد سرفراز ډوګر بايد له کمېټې څخه لرې کړل شوے وے، او د جوډيشل کونسل بيا تنظيم ضروري وه۔ که چيرې دا وړانديز شوې ترميمونه منظور شي، نو دا به د عدليې آزادي محدوده کړي۔