ملګري ملتونه: پاکستان دې د افغان کډوالو جبري اخراج لړۍ ودروي
کوهاټ (نعمت الله خان ) د ملګرو ملتونو د کډوالو عالي کمېشنرۍ (يو اېن اېچ سي ار) يو ځل بيا له پاکستاني حکومت غوښتي چې د افغان کډوالو د جبري ايستلو بهير ودروي او د دوي د مېشتځايونو د تړلو پرېکړه بېرته واخلي.
دا غوښتنه په جېنوا کې د ملګرو ملتونو د اجرايوي کمېټې په غونډه کې شوې.
يادې غونډې ته په پاکستان کې د (يو اېن اېچ سي ار) استازې فيلپا ګرينډېل وويل، د پاکستان حکومت په بلوچستان او خيبر پښتونخوا کې د کډوالو 16 کمپونه تړلي او مېشت افغان کډوال يې "ناقانونه" اعلان کړي.
اغلې ګرينډېل زياته کړه، پاکستان د تېرو 45 کلونو راهيسې د افغان کډوالو کوربه پاتې شوي او نړيوال يې د دې کوربتوب ستاينه کوي، خو د کډوالو بېرته لېږل بايد په خپله خوښه وشي، نه په جبري توګه.
هغې ټينګار وکړ چې د ملګرو ملتونو سازمان د افغان کډوالو د ستونزو د هوارولو په موخه له پاکستان سره د ګډ کار کولو چمتو دي.
د يادونې ده، چې د پاکستان حکومت د ناقانونه بهرنيانو د ايستلو پلان (اي اېف ار پي) درېيم پړاو پيل کړي چې له مخې يې ګڼ افغان کډوال هم د جبري ايستلو په نوملړ کې شامل شوي دي. حکومت وايي، ناقانونه مېشت بهرنيان په هېواد کې د ناامنۍ سبب ګرځي.
What's Your Reaction?
Like
0
Dislike
0
Love
0
Funny
0
Angry
0
Sad
0
Wow
0
