امريکې، مصر، قطر اؤ ترکي په غزه امن معاهده لاسليکونه وکړل

شرم الشيخ( وحدت خبر)په مصر کښې د شرم‌الشيخ ښار کښې جوړې شوې د غزې د سولې سرمشريزې غونډې کښې د اسراييلو او حماس ترمنځ د غزې د سولې تړون باندې د امريکا ولسمشر ډونلډ ټرمپ، او د مصر، قطر او ترکيې مشرانو لاسليکونه وکړل. دنړيوالې ميډيا رپورټونو ترمخه په دغه کانفرنس کښې د پاکستان استازيتوب وزيراعظم شهباز شريف وکړو، او نورو ګډونوالو کښې د ملګرو ملتونو سرمنشي انتونيو ګوتريش، د عرب ليګ سرمنشي احمد ابوالغيط، د فرانس ولسمشر ايمانويل مکرون، د ترکيې ولسمشر رجب طيب اردوغان، د برتانيې وزيراعظم کير سټارمر، د اندونيزيا اولسمشر پرابوو سوبيانتو، د اروپايي شورا مشر انتونيو کوسټا، او د جرمني چانسلر فريډريک مرز شامل وو. سربېره پر دې، د هسپانيا وزيراعظم پيدرو سانچيز، د کويت وزيراعظم احمد العبدالله الصباح، د ايټاليا وزيراعظم جورجيا ميلوني، د کاناډا وزيراعظم مارک کارني، او د عراق وزيراعظم محمد شياع السوداني هم د غزې د سولې په کانفرانس کښې برخه اخيستې وه. په دې موقع د امريکا ولسمشر ډونلډ ټرمپ وويل: «نن د غزې د خلقو لپاره تاريخي ورځ ده. د غزې د سولې په تړون کښې د مصر رول ډېر مهم دے. د دغه تړون له کبله به په غزه کښې امن او پرمختګ راشي. موږ غواړو په منځني ختيځ کښې دايمي سوله او ثبات رامنځته شي.» ټرمپ زياته کړه چې د دوستو هيوادونو د مرستې په سبب دا تړون ممکن شو، او زه د ټولو مننه کوم چې د غزې د سولې تړون لپاره يې مرسته وکړه. د امريکا ولسمشر وويل: «هر څوک په دې موقع خوښ دي. موږ تر دې وړاندې هم لوي تړونونه کړي دي، خو دا معامله خو لکه د راکټ په شان پورته وخته!»