داوړو اؤ غنمو ترسيل لپاره دوزيراعلى پنجاب ته دخط ليکلو هدايت

پېښور( وحدت خبر) د خيبر پښتونخوا وزيراعليٰ محمد سهيل افريدي  صوبه  کښي د اوړو او  غنمو د آزادانه ترسيل لپاره د پنجاب حکومت ته دخط  ليکلو  هدايت کړے دے. هغه ووئيل چې د اوړو او  غنمو ترسيل بندول د  ائين خلاف ورزي ده، د سياسي اختلافاتو  له امله  د پنجاب حکومت د خيبر پښتونخوا د خلقو بنيادي حقوق سلب کوي. د چهارشنبې په ورځ د وزيراعليٰ سيکرټريټ کښې د خوراک   محکمې غونډې  د مشرۍ   کولو په وخت وزيراعليٰ د خوراک  محکمې ته هدايت کړے چې د ذخيره اندوزۍ مخه ونيسي او خلقو ته د سرکاري نرخونو مطابق  د خوراکي توکي ورکول يقيني کړي. وزيراعليٰ د صوبې  د ټولو ګودامونو ته د فوري  رجسټريشن  احکامت هم جاري کړيدي  ، په غونډه کښې وزيراعليٰ ته   صوبې کښې د  غنمو او چينۍ ذخيرې او نرخونو په اړه تفصيلي معلومات ورکړل شول. ګډونوالو ته ووئيل شول چې د خيبر پښتونخوا کلني  غنمو  او اوړو مصرف شاوخوا 53 لکه ميټريک ټنه دے، چې له دې جملې 15 لکه ميټريک ټنه ځائي توليد دے، او پاتې اړتيا د پنجاب او نورو صوبو  نه پوره کيږي. په صوبه کښې   ګودامونو کښې اوس مهال شاوخوا 2 لکه 73 زره ميټريک ټنه  غنمو ذخيره موجوده ده. په غونډه کښې ووئيل شول چې په صوبه کښې د اوړو قيمتونو زياتيدو  بنيادي  وجه د پنجاب څخه د  غنمو او اوړو ترسيل کښې خنډ دے. د چيني په اړه معلومات ورکړل شول چې د صوبې کلني اړتيا 10 لکه ټنه ده، چې له دې 30 فيصد د کورنيو لپاره او 70 فيصد د تجارتي هدفونو لپاره استعماليږي. اوس مهال صوبه کښې 4 لکه 80 زره ميټريک ټنه چينۍ ذخيره موجوده ده.