په تورخم پوله تګ راتګ اؤ تجارت د١١ؤ ورځو راهسې معطل، دپرانستل کيدو تيارۍ

لنډي کوتل( وحدت خبريال)  د افغانستان سره د خرابو حالاتو له وجې، د تېرو  يوولسو ورځو راهيسې د تورخم او چمن پوله د ټولو تجارتي چارو لپاره تړلې ده، خو تمه ده چې تورخم بارډر به راتلونکو 24 نه تر 48 ساعتونو پورې پرانيستل شي۔  د ډان نيوز د رپورټ له مخې، د تورخم بارډر  يوولسمه ورځ ده چې تړلے پروت دے، او طمعه څرګندېږي چې دا به په دوو ورځو کښې د تجارت او د خلقو د تګ راتګ لپاره خلاص شي۔ سرچينو ويلي چې د پاکستان او افغانستان تر منځ د سولې تړون وروسته،  نن يا سبا د پولې خلاصولو امکان شته، او په دې اړه تيارۍ روانې دي۔ د تورخم بارډر باندې امپورټ او اېکسپورټ سکينرونه هم لګول شوي دي۔ د بارډر بندېدو له وجې د دواړو خواوو پۀ سرحد اوږدې قطارونه د مال وړونکو ګاډو ولاړ دي۔  د پاکستان او افغانستان تر منځ نښتو له امله د تېرو يوولسو ورځو راهيسې تورخم پوله د هر قسم تګ راتګ لپاره بنده ده، چې له امله يې کاروباريان، مزدوران، او عام خلق سخت پرېشان دي۔ سرچينو دا هم ويلي چې د پاکستان يوه لوړه کچه وفد به   افغانستان ته لاړ شي، چرته چې به د پاکستاني او افغاني چارواکو تر منځ د سرحدي چارو او نورو موضوعاتو باندې خبرې اترې وشي۔ سرچينې زياتوي چې دا دوره له وړاندې نه پلان شوې وه، او د اوسني حالاتو سره مستقيم تړاو نه لري۔ سرچينو دا هم ويلي چې د دواړو هيوادونو چارواکو د پولې خلاصولو په اړه اصولي موافقه کړې ده، او د افغان لوري نه ويل شوي چې د هغوي اړخ ته د کسټم عمله هم ځائے پۀ  ځائے کړل شوې ده۔