وفاقي کابينې په ټي ايل پي دبنديز منظوري ورکړه

  وفاقي کابينې د ترهګرۍ ضد قانون (Anti-Terrorism Act) تر مادې لاندې پر مذهبي او سياسي ډلې تحريک لبېک پاکستان (TLP) د بنديز لګولومنظوري ورکړې ده.

 د وزيراعظم په مشرۍ د کابينې غونډه وشوه، چې پکښې د پنجاب حکومت له خوا پۀ  ټي ايل پي  د بنديز د سپارښتنې په اړه غړو ته معلومات ورکړل شول۔

وفاقي کابينې د ائين د ۱۷ مادې لاندې  پۀ ټي ايل پي  پر بنديز اتفاق وکړو، او د کورنيو چارو وزارت ته يې د لا نورو قانوني ګامونو د اخيستلو امر وکړو۔

 د کابينې د غونډې اعلاميه

د اعلاميې له مخې، د پنجاب حکومت په غوښتنه د کورنيو چارو وزارت يوه سمري وفاقي کابينې ته وړاندې کړل شوه، او کابينې په متفقه توګه پرېکړه وکړه چې ټي ايل پي دې د ترهګرۍ ضد قانون له مخې يوه کالعدم  ډله وبلل شي۔

وفاقي کابينې ته د ټي ايل پي د تاوتريخوالي او ترهګرو کړنو په اړه تفصيلي بريفنګ ورکړل شو۔

په غونډه کښې د پنجاب د حکومت لوړ پوړو چارواکو د ويډيو لينک له لارې ګډون وکړو، او غونډې ته د دغې   ډلې د تاوتريخوالو او ګډوډۍ جوړولو په اړه معلومات وړاندې شول۔

بريفنګ کښې وويل شول چې دا ډله د ۲۰۱۶ کال راهيسې فعاله ده، او د ټول هېواد په بېلابېلو برخو کښې يې د شر او ګډوډۍ پېښې رامنځته کړې دي۔

په ۲۰۲۱ کال کښې هم پر ټي ايل پي  بنديز ولګېدو، خو شپږ مياشتې وروسته دې شرط سره بنديز لرې شو چې بيا به د تشدد يا ګډوډۍ پېښې نه جوړوي۔ اوسنے بنديز د همدې ژمنو ماتولو له امله يو ځل بيا لګول شوے دے۔

په اعلاميه کښې ويل شوي چې د ټي ايل پي  د تاوتريخوالي نه ډکو احتجاجونو او مظاهرو پر مهال د امنيتي ځواکونو غړي او بې‌ګناه خلک وژل شوي دي۔

د بريفنګ او د پنجاب د حکومت د سپارښتنې وروسته، وفاقي کابينې په متفقه توګه دا پرېکړه وکړه چې تحريک لبېک پاکستان د ترهګرۍ او تاوتريخوالي په کارونو کښې ښکېله ده۔