په اسلام اباد او پنډۍ ښارونو کې ګڼ شمېر افغان کډوال نيول شوي

کوهاټ ( نعمت الله خان )د پاکستان پلازمېنه اسلام‌اباد او لوي ښار راولپنډۍ کې پوليسو د افغان کډوالو د نيولو عمليات پيل کړي، او په دواړو ښارونو کې مېشت ګڼ شمېر کې افغان کډوال نيولي دي.

په راولپنډۍ کې د افغان کډوالو ټولنې مشرانو په ټولنيزو رسنيو کې خپره کړي پيغامونو کې ويلي، چې د اسلام‌اباد او راولپنډۍ پوليس افغان کډوال نيسي او د افغانستان يې ستنوي.

د پوليسو دريځ دي، چې دغه عمليات د ناقانونه مېشتو بهرنيو وګړو پر ضد دي، او هېچا ته پرته له قانوني اسنادو په پاکستان کې د اوسېدو اجازه نه لري.

د کډوالو مشرانو په وينا، پوليس د قانوني او ناقانونه کډوالو ترمنځ توپير نه کوي، ټول نيسي او د بېرته لېږد مرکز ته‌ يې انتقالوي چې وروسته يې له دغه ځايه‌ د تورخم له لارې افغانستان ته ستنوي.

د افغان کډوالو د نيولو عمليات له هغه وروسته پيل شول، چې په پاکستان کې مېشتو افغان کډوالو ته د استوګنې لپاره ورکړل شويو کارتونو موده د تېرې مياشتې جون پر ۳۰مه نېټه پاي ته ورسېدلې.

که څه هم د پاکستان د سرحداتو او قبايلي چارو وزارت (سېفران) لخوا په يوه خپور شوي امر کې پوليسو او نورو امنيتي ادارو ته ويلي وو، تر هغې پورې به افغان کډوال نه نيول کېږي، تر څو چې د دغه هېواد پارليمان يې په اړه پرېکړه نه وي کړې.

په پاکستان کې د ملګرو ملتونو د کډوالو عالي کمېشنرۍ (UNHCR) لخوا د پروف اف رجسټرېشن (PoR) نومې کارت لرونکي ۱.۴ ميليونه افغان کډوال دا مهال اندېښمن دي، ځکه د دغو د کارتونو اعتبار موده پاي ته رسېدلې ده، خو تر اوسه د پاکستان حکومت له خوا د تمديد په اړه کوم رسمي امر نه دي شوي.

دغو کډوالو ويلي، چې دوي اندېښنه لري که چېرې د اوسېدو موده ورته ونه غځول شي، نو د هېواد ته په سملاسي لېږد سره به له ګڼو ستونزو سره مخ شي، ځکه چې ياد کډوال له څلورو لسيزو راهيسې په پاکستان کې مېشت دي، د دوي څلور نسلونه دلته زېږېدلي، دلته پر زده‌کړو بوخت دي او په پراخه کچه کاروبارونه لري.

کډوال زياتوي، د بېرته ستنولو لپاره دې د ملګرو ملتونو عالي کمېشنرۍ، پاکستان او افغانستان دې دغو کډوالو لپاره يوه داسې تګلاره جوړه کړي، چې دوي خپل هېواد ته په خوندي توګه بېرته ستانه شي.