کوهاټ کې د عوامي نېشنل ګوند پلويان د کونړ زلزلې ځپلو لپاره مرسته ټولوي

کوهاټ ( نعمت الله خان )

په کوهاټ کې د عوامي نېشنل ګوند (اې اېن پي) ضلعي مشرانو او پلويانو د افغانستان د کونړ ولايت د وروستۍ زلزلې ځپليو لپاره د مرستو راټولو لړۍ پيل کړې.

د ګوند ضلعي مشر مسعود خان خليل او ضلعي عمومي سېکتر ډاکټر اشتياق خټک رسنيو ته ويلي چې د مرستو دا لړۍ د (اې اېن پي) د مرکزي مشر ايمل ولي خان په لارښوونه پيل شوې ده.

دوی زياته کړه، چې د مرستو ټولولو بهير يوازې کوهاټ پورې محدود نه دی، بلکې د خېبر پښتونخوا په ټولو ضلعو کې روان دی.

 د دوی په وينا، د افغانستان د وروستۍ زلزلې له اغېزمنو سره به د انساني خواخوږۍ او ورورولۍ پر بنسټ هر ډول مرسته کوي.

په کوهاټ کې د ګوند له لوري د باچا خان څلورلاري په سیمه کې د مرستو خېمه لګول شوې ده او له شتمنو خلکو غوښتنه کېږي چې د زلزلې ځپلو لپاره د نغدو پيسو تر څنګ د هر ډول د اړينو  توکو مرسته بايد وکړي.

د ګوند ضلعي عمومي سېکتر ډاکټر اشتياق خټک زياته کړه، چې ټولې راغونډې شوې مرستې به پېښور کې د باچا خان مرکز ته انتقالېږي او له هغه ځایه د باچا خان ټرسټ فاونډېشن له لارې د کونړ ولايت زلزله ځپليو ته رسول کېږي.