د امنيتي ځواکونو کامياب عمليات: د فتنۃ الخوارج 34ترهګر ووژل شوي

د اکتوبر له ۱۳مې تر ۱۵مې نېټې پورې د خيبرپښتونخوا په مختلفو ولسواليو کښې د امنيتي ځواکونو لخوا په کاميابو عملياتو کښې د هند لخوا ملاتړ کېدونکي فتنۃ الخوارج ډلې 34 ترهګر وژل شوي دي.

د پاک پوځ د عامه اړيکو څانګې (ائي ايس پي ار) له خوا په خپره شوې خبرپاڼه کښې ويل شوي، چې دا عمليات د خيبرپښتونخوا په بېلابېلو سيمو کښې ترسره شول، چې پکې د هند ملاتړ لرونکو فتنۃ الخوارج پورې تړلو ترهګرو ته درنه مرګ‌ژوبله واوښته.

د بيان له مخې، د شمالي وزيرستان د سپين وام په سيمه کښې د ترهګرو د موجودګۍ په اطلاع عمليات وشول. د استخباراتي معلوماتو پر بنسټ ترسره شوي دې عملياتو کښې امنيتي ځواکونو د ترهګرو مرکز په مؤثر ډول هدف وګرځاوه، چې پکې د سختې نښتې وروسته 18 ترهګر ووژل شول.

د پوځ وياند وويل چې بله نښته په جنوبي وزيرستان کښې وشوه، چيرته چې د ډزو تبادله کښې 8نور ترهګر ووژل شول. درېيمه نښته په بنو کښې وشوه، چيرته چې امنيتي ځواکونو 8 نور ترهګر له منځه يوړل.

ائي ايس پي ار زياته کړه چې په سيمه کښې د پاتې نورو هند ملاتړ لرونکو خوارجو د ختمولو لپاره د تصفيې عمليات لا هم روان دي.