اليکشن کمېشن د سپيکر له ريفرنس نه بغير د نااهلۍ واک نه لري، پېښور هائيکورټ

پېښور هايکورټ وئيلي، چې د سپريم کورټ د فيصلې له مخې، اليکشن کمېشن دا واک نه لري چې د پارلمان کوم غړے د سپيکر د ريفرنس  نه بغير نااهله کړي. عدالت زياته کړې چې اليکشن کمېشن د سپريم کورټ د فيصلې ناسم تعبير کړے  دے. عدالت دا څرګندونې د پاکستان تحريک انصاف لخوا د ورکړل شوو درخواستونو په اورېدنه کښې وکړې، او په خپل تحريري حکم کښې ئې د اليکشن کمېشن هغه پرېکړې ځنډولې چې له مخې يې غوښتل د سينيټ او قومي اسمبلۍ لپاره نوي اپوزيشن ليډران مقرر کړي. په حکم کښې ويل شوي چې تر بلې اورېدنې پورې دې د قومي اسمبلۍ نوي اپوزيشن ليډر ونه ټاکل شي. د پي ټي آئي وکيل عدالت ته ويلي، چې د ترهګرۍ ضد عدالت (ATC) د جولائي پۀ ۳۱مه د درخواست کوونکي پۀ ضد سزا واوروله، خو اليکشن کمېشن د اګست پۀ ۵مه  له خپله انده په نوټس اخستو سره هغه نااهله اعلان کړو،   په تحريري حکم کښې د درخواست کوونکي وکيل دا څرګنده کړه چې اليکشن کمېشن د سپريم کورټ د فيصلې غلط تعبير کړے دے. د درخواست کوونکي په وينا، اليکشن کمېشن د اګست پر ۵مه د هغه نااهلي اعلان کړه، او بيا د اګست پۀ ۷مه، د قومي اسمبلۍ سپيکر هغه ډي‌نوټيفاي کړو او د اپوزيشن څوکۍ ئې خالي وبلله. درخواست کوونکي استدلال کړے چې د اپوزيشن تر ټولو زيات  پارلماني استازيتوب هم د دوي له ډلې سره دے، او اندېښنه لري چې نورې خواوې به هڅه وکړي د بلې ډلې لپاره اسانتياوې برابرې کړي او اپوزيشن ليډر ورته وټاکي.   د دې  کيس اساسي او مهمه پوښتنه دا ده چې اليکشن کمېشن ولي له سپيکر د رسمي ريفرنس پرته يو غړي نااهله اعلان کړے؟