دسعودي دلوړې کچې کاروباري وفد په تجارت اؤ سرمايه کارۍ دخبرو لپاره پاکستان ته راورسيدو

د سعودي عرب يو لوړ پوړے تجارتي وفد، د پاک-سعودي ګډې بزنس کونسل د مشر شهزاده منصور بن محمد ال سعود په مشرۍ اسلام اباد ته رارسېدلے، چيرته چې به د تجارت، سرمايې کارۍ او دوه اړخيزو همکاريو په موضوعاتو خبرې اترې کوي.

دا پرمختګ   پۀ داسې حال کښې  مخې ته راغلے دے  چې پاکستان د سعودي عرب سره د دوه اړخيزو اقتصادي اړيکو او مذاکراتو د څار لپاره 18 کسيزه کميټي جوړه کړې. تېره مياشت دواړو هيوادونو يو ګډ دفاعي تړون هم لاسليک کړے و، چې له مخې يې د هر ډول تېري په صورت کښې د ګډ غبرګون ژمنه شوې ده.

د بهرنيو چارو وزارت د بيان له مخې، شهزاده منصور بن محمد ال سعود او ورسره راغلي پلاوي به د پاکستان له مشرتابه سره ملاقاتونه کوي، او له لوړ پوړو حکومتي چارواکو، د صنعت او سوداګرۍ له خونې (چيمبرز آف کامرس) او له مشهورو کاروباري ډلو سره مشورې کوي، تر څو د دوه اړخيز تجارت او سرمايې کارۍ د ودې امکانات وڅېړي.

په بيان کښې دا هم ويل شوي چې دا سفر د پاکستان او سعودي عرب تر منځ ژور او وروڼولي اړيکې څرګندوي، او دا د دواړو هېوادونو هغه هوډ ښائي چي د پاک-سعودي ګډې بزنس کونسل د چوکاټ لاندې اقتصادي او سرمايه کارۍ شراکت ته پراختيا ورکړي.