حماس مصر کښې جاري مذاکراتو کښې خپلې غوښتنې پيش کړې

د امريکې د صدر ډونلډ ټرمپ لخوا وړاندې شوي د غزې د امن منصوبې په لړ کښې  په مصر کښې   دروانو مذاکراتو په دوران فلسطيني مزاحمتي ډلې  حماس دائيمي اوربند، او د اسراييلي ځواکونو د مکمل وتلو په ګډون نورې مهمې  غوښتنې وړاندې کړي دي.

د قطري چينل الجزيره د راپور له مخې، حماس د مصر په منځګړيتوب روانو خبرو کښې خپلې بنيادي مطالبې  او غوښتنې په ډاګه کړې دي.

د حماس وياند، فوزي برهوم، وئيلي دي چې د دوي  وفد دا   کوشش کوي چي "ټول  خنډونه له مخې لرې کړي" تر څو يو داسې معاهده وشي چي "د غزې د اولس هيلو او ارمانونو ته ځواب ووئيلے شي".

د فوزي برهوم په وينا، د حماس مهم غوښتنې دا دي، يو دايمي او هر اړخيز اوربند؛، د اسراييلي ځواکونو مکمل انخلا له غزې نه؛ د انسانې مرستو او ضروري سامانونو  غزه ته  بې قيده رسد،  بې کوره خلکو ته خپلو کورونو ته د ستنېدو اجازه، د غزې د بيا رغونې بيړنے پيل، چي د يو فلسطيني ملي تخنيکي ادارې تر څارنې لاندې وشي؛  او د بنديانو د تبادلې يو عادلانه معاهده.