پاکستان او افغانستان دې سياستونو کښې بنسټيز تغير راولي، فتانه اسحاق ګيلاني

  کابل ( وحدت خبريال)

فعالې افغان ميرمن او د ميرمنو د سازمان مشرې فتانه اسحق ګيلاني ويلي پاکستان او افغانستان دې سياستونو کښې بنسټيز تغير راولي . له پرديو نه دستور او مشوره اخيستل ښه نتيجه نلري . د منطقوي امن او پرمختګ لپاره د افغانستان او پاکستان د ښو اړيکو او متقابل احترام ضرورت دے . فتانه اسحق ګيلاني وحدت سره خبرو کښې د افغانستان او پاکستان ترمينځ د سرحدونو په بنديدو ، وروستيو بريدونو او په پاکستان کښې د افغانانو په بد وضعيت سخته خواشيني وښوده او ويويل د سرحدونو په بنديدو اولسي خلقو ته زيات تاوانونه اوړي . دلته ډير ناروغان دي چې هغوي بايد اسلام اباد او پيښور کښې هسپتالونو ته لاړ شي ، خپل علاج وکړي .  دغه راز د سرحدونو په بنديدو تجارانو ته زيانونه اوړي ، د تجارانو سبزي او ميوې خرابيږي ، د موټرو کرايې او د مزدورانو مصارف پرې راځي . نو مونږ د پاکستان له واکمن حکومت جدي هيله کوو چې تړلي سرحدونه او تجارتي لارې پرانيزي . دغه راز په پاکستان کښې د ميشتو افغانانو سره د پوليسو او نورو ادارو وضعيت ښه شي . هغې وويل کوم افغانان چې پاکستان کښې مهاجر دي ، هغوي خپل کاروبار کوي او غواړي چې اولادونه يې مکتبونه ووايي . دلته نه کاروبار شته دي او نه د ښوونځيو دروازې خلاصي دي . فتانه اسحق ګيلاني وويل په پاکستان کښې چې کومې سياسي لوبې چې جريان لري ، په هغې کښې افغانان ملوث نه دي . افغانان ډير قدردان او خواخوږي خلک دي ، احسان فراموش نه مخکې وو او نه اوس دي ، بلکې د نورو احسان ته په دروند نظر ګوري او منندوي يې دي . هغې وويل مونږ په بار ، بار د پاکستان مشرانو ته ويلي چې تاسو په افغان ولس پانګونه وکړي ، نه په يو ګروپ او ډلو ، په ګروپ او ډلو سرمايه ګزاري ښه پايله نلري . هغې وويل ما د خپل ولس د خير او سلامتيا لپاره اوږده مبارزه کړې ، په جنګ کښې لاس نه لرو او تل مو له جنګ نفرت کړې دي . جنګ تباهي ده ، جنګ د انسانانو وژل لري ، جنګ کلي او ښارونه بربادوي . د افغان ميرمنو سازمان مشرې دا هم وويل هيڅوک نه شي کولي چې افغانستان ددې منطقې وباسي او بل چرته يې يوسي ، نه دا څوک کولي شي چې پاکستان يو بل ځاي ته انتقال کړي . مونږ بيا هم د دواړو هيوادونو له مشرانو ، سياسي شخصيتونو او بادرده خلکو غواړو چې متحد شئ او سيمه د جنګ له لمبو ، ورانيو او وژنو وساتئ .