پاکستان باور راکړے چېدامريکې سره تعلقاتو نه به دبيجنګ مفاداتو ته زيان نۀ رسيږي،چين

چين ويلي دي چې پاکستان ډاډ ورکړے چې د امريکا سره يې اړيکې به هېڅکله د بيجينګ په ګټو او د چين–پاکستان په ګډو همکاريو منفي اغېز ونه کړي. د چين د خبري اژانس  شين‌هوا  د راپور له مخې، د چين د بهرنيو چارو وزارت وياند  لن جيان  ويلي چې د چين له خوا وروستي وخت کښې د “نايابه منرالو” (Rare Earth Minerals) او اړوندو موادو پۀ صادراتو لګېدلې بنديزونه د پاکستان سره هېڅ تړاو نه لري. وياند وويل چې دا ګامونه د چين حکومت د خپلو صادراتي کنټرولونو د ښه‌والي لپاره د قانون او اصولو په رڼا کښې اخېستي، او دا يو مشروع او منظم اقدام دے. لن جيان دا خبرې د يوې منظمې خبري ناستې پر مهال وکړې، کله چې له ده وپوښتل شول د هغو راپورونو په اړه تبصره وکړي چې پکښې ويل شوي و، پاکستان د چيني وسايلو او ټېکنالوژۍ په مرسته نايابه معدني مواد امريکا ته صادروي، او ګواکې همدغه لامل دے چې چين د دغو موادو د ټېکنالوژۍ پۀ صادراتو سخت کنټرولونه پځائے کړيدي. د وياند په وينا، چين او پاکستان د هر موسم ستراتيژيک شريکان دي، او د دواړو هېوادونو ترمنځ د “فولادي دوستۍ” اړيکه د وخت په تېرېدو سره لا نوره پياوړې شوې ده. ده وويل چې دواړه خواوې تل د لوړې کچې ستراتيژيک باور او د ګډو ګټو په مهمو موضوعاتو کښې له يو بل سره نزدې اړيکې ساتي. لن جيان زياته کړه: “تر کومه ځايه چې زما معلومات دي، د چين او پاکستان ترمنځ د اسلام‌اباد او واشنګټن د معدني همکاريو په اړه خبرې شوې دي. پاکستان ټينګار کړے چې د امريکا سره به ئې اړيکې د بيجينګ په ګټو او د چين–پاکستان په ګډو همکاريو هېڅ منفي اغېز نه لري.”