جنوبي وزيرستان، دتيلو بيعو کښې دزياتوالي خلاف دپي ټي ائي احتجاج

وانا (نورعلي)  د جنوبي وزيرستان لوئر سيمې وانا کښې د پټرول او ډيزل د قيمتونو وروستي زياتوالي پۀ ضد د انصاف يوتھ ونګ کارکنانو احتجاجي مظاهره وکړه۔ دا مظاهره د صوبائي صدر جنيد اکبر خان، د انصاف يوتھ ونګ ساؤتھ ريجن صدر عبدالوسيع محسود او سيکرټري جنرل حسن خټک په هدايت ترسره شوه۔ په مظاهره کښې ګډونوالو ځوانانو د حکومت پۀ ضد پلے کارډونه او بينرونه پورته کړي وو، چې پرې  د مهنګايۍ پۀ ضد شعارونه ليکل شوي وو۔ مظاهره کوونکو ووئيل چې د پټروليم مصنوعاتو قيمتونو مسلسل زياتوالے د خلقو پۀ ضد ظلم دے، چې دعامو خلقو   ژوند ئې له سختو ستونزو سره مخ کړے دے۔ ګډونوالو وويل چې د مهنګايۍ وروستۍ چپه د غريب او متوسط طبقو ژوند ګران کړے، په داسې حال کښې چې حکومت د خلقو لپاره راحت برابرولو کښې ناکام ښکاري۔ دوي غوښتنه وکړه چې د پټرول او ډيزل قيمتونو کښې فوري کموالے دې  وشي او د ګرانۍ د کنټرول لپاره دې  مؤثره  او عملي اقدامات ترسره شي۔ د احتجاج په   وخت  ځوانانو څرګنده کړه چې دوي به د خلقو د حقونو لپاره پۀ  هر سطحه خپل غږ پورته کوي او د ناانصافي پۀ ضد به خپله مبارزه جاري ساتي۔ د مظاهرې مشري د پي ټي آئي سينئر رهبر ګل محمد وزير کړې  ۔ مظاهره کوونکو د مهنگايۍ پۀ ضد شعارونه ورکړل او د حکومت پۀ ضد ئې  خپله  غصه څرګنده کړه۔ مقررينو زياته کړه چې  نرخونو کښې د  زياتوالي وروسته د پټرول او ډيزل قيمتونه د تاريخ تر ټولو لوړې سطحې ته رسېدلي، چې د خلقو ستونزې ئې  لا پسې زياتې کړي دي۔ دوي د جنوبي وزيرستان لوئر خلقو نه غوښتنه وکړه چې د مهنگايۍ پۀ ضد په احتجاج کښې په پوره توګه ګډون وکړي۔