خېبرپښتونخوا کښې 35 ترهه ګر هلاک،12 پوځيان شهيدان

په خيبر پښتونخوا کښې د استخباراتي معلوماتو پۀ اساس عملياتو کښې د هندوستان له ملاتړه برخمن 35 د "فتنۃ الخوارج" ترهګر وژل شوي، او 12 پوځيان شهيدان شوي دي.

د پاکستان د پوځ د عامه اړيکو څانګې  ( ائي ايس پي ار) له مخې، د ستمبر له 10 نه تر 13 پورې په خيبر پښتونخوا کښې په دوو جلا جلا عملياتو کښې د هند لخوا تمويلېدونکي د "فتنۃ الخوارج" ډلې 35 ترهګر ووژل شول.

د پوځ وياند وائي، د استخباراتي معلوماتو له مخې د باجوړ په ضلع کښې عمليات ترسره شول، چيرته چې د سختې جګړې وروسته 22 د هند لخوا ملاتړي خوارج ترهګر ووژل شول.

دوهم عمليات په جنوبي وزيرستان کښې وشول، چرته چې نور 13 ترهګر وژل شوي، خو د سختې نښتي په مهال د وطن 12 زړور عسکر د شهادت لوړ مقام ته ورسيدل.

د ائي ايس پي ار له مخې، د وژل شوو ترهګرو نه وسلې او بارود نيول شوي دي. دغه ترهګر په ياده سيمه کښې د  دورانکارۍ  فعاليتونو کښې ککړ وو.

 استخباراتي راپورونه دا هم ښائي چې په دغو ترهګريزو بريدونو کښې افغان وګړي نېغ په نېغه دخيل وو، او د افغان خاورې نه د پاکستان پۀ ضد کار اخيستل لا هم د اندېښنې وړ خبره ده.

پاکستان له عبوري افغان حکومت نه تمه لري چې خپلې ذمه وارۍ پوره کړي او خپله خاوره د پاکستان پۀ ضد د ترهګرۍ لپاره استعمال ته پرېنږدي.

د امنيتي ځواکونو له خوا د علاقې د پاکولو لپاره "سينيټايزيشن عمليات" روان دي. پوځ خپل دا عزم يو ځل بيا تکرار کړي دي چې د هند لخوا تمويلېدونکې ترهګري به ختمه کړي.

د ائي ايس پي ار په وينا، زمونږ د زړورو سرتېرو قربانۍ زمونږ هوډ لا پياوړي کوي.