ملک کښې دعدليې په نوم کوم څيز نشته، عمر ايوب

دپاکستان تحريک انصاف رهنما اؤ په قومي اسمبلۍ کښې دحزب اختلاف مشر عمر ايوب وئيلي دي چې ملک کښې دعدليې په نوم کوم څيز نشته

 عمر ايوب وئيلي دي چې  دپارټۍ مشرانو ته غلطې سزاګانې ورکړے شويدي، زما دګرفتارۍ وارنټ جاري کؤے شوے دے، دواقعاتو نه څرګنديږي چې دا وخت په پاکستان کښې  دعدليې په نوم څه څيز نشته.

دۀ وئيلي دي چې دلته لاء اينډ ارډر نشته، عدل او انصاف به چاته ترلاسه شي؟ زما دوه سټاف ممبران دهري پور دجبري کلي نه پورته کړے شويدي، څلور ورځې کيږي، ددوي هيڅ پته ونۀ لګيده.

 دحزب اختلاف قائد پخپل يو بيان کښې وئيلي دي چې  احمدخان  اؤ دياسمين راشد په شمول نورو دپارټۍ مشرانو ته غلطې سزاګانې ورکړے شويدي، دا ټوټل يو فراډ روان دے. عمر ايوب وئيلي دي چې  دپي ټي ائي باني اؤ بشرى بيګم دتنهايۍ په قيد کښې ساتل شويدي، دوي ته سهولتونه نۀ ورکول کيږي، دپخواني وزيراعظم په حېث چې هغه ته کوم سهولتونه ورکول پکار وو، نۀ دي ورکړے شي، زمونږ دعا ده چې په پاکستان کښې زر امن راشي اؤ ملک ترقي وکړي.

دۀ ووئيل چې په پاکستان دفارم ٤٧ حکومت مسلط کړے شوے دے.