امن زمونږ بنيادي ضرورت دے،دوزيراعلى په مشرۍ دکرمې جرګه

پېښور( وحدت خبر) وزير اعليٰ خيبر پښتونخوا علي امين خان ګنډاپور تر مشرۍ لاندې د امن و امن وامان  په اړه  د  علاقائي جرګو لړۍ پاې ته ورسېده. په دې لړ کښې څلورمه او وروستي مشاورتي جرګه   تيره ورځ  د وزير اعليٰ هاؤس پېښور کښې ترسره شوه، چې په کښې د ضلع کرم اپر، سنټرل او لوئر قبايلي مشرانو، د سياسي ګوندونو استازو او   متعلقه دصوبائي اسمبلۍ غړو  پۀ ګڼ شمېر کښې  ګډون وکړو.  د وزير اعليٰ د معلوماتو او عامه اړيکو مشاور بيرسټر محمد علي سيف، سينيټر نور الحق قادري، چيف سيکرټر شهاب علي شاه، او آئي جي پي ذوالفقار حميد  ترڅنګ متعلقه  کمشنر ، ډپټي کمشنر  او د پوليسو چارواکو هم په جرګه کښې ګډون درلودو. جرګې په خپلو سپارښتنو کښې د قبايلي مشران د جرګو جوړولو لپاره د وزير اعليٰ د هڅو ستاينه وکړه او ويې ويل چې د کرمې ستونزه په سوله ييزه توګه حل کولو او سيمې ته ځانګړي پرمختيايي پيکيج ورکولو په خاطر د وزير اعليٰ او صوبائي حکومت   مننه کوي. په سختو حالاتو کښې د کرمې لپاره هيلي کاپټر سروېس پيل کولو او د خلقو سره د بشپړې مرستې لپاره هم د  وزير اعليٰ مننه کوي. د وزير اعليٰ ځانګړو هڅو سره کرمه کښې په اوس وخت کښې امن بحال شوے، خو دا امن بايد دوام وکړي. د کرمې اهل سنت او اهل تشيع دواړه د سيمې د امن لپاره يو ځائے دي او د دې په اړه حکومت سره هر ډول همکاري لپاره تيار دي. امن زمونږ بنيادي ضرورت دے، که امن وي، پرمختګ به وي.  جرګې غړو وويل چې مونږ د هر ډول ترهګرۍ خلاف يو، د امن لپاره د حکومت سره يو ځائے يو، او د مسئلې د حل لپاره بايد د وفاقي او صوبائي حکومتونو، امنيتي ادارو او سيمې د مشران ګډه ځواکمنه جرګه جوړه شي، تر څو د افغانستان سره مذاکرات وشي، ځکه چې د کرمې امن مسئله د افغانستان سره  تړلې ده . د سيمې خلقو ته د روزګار د ورکولو لپاره بايد د افغانستان سره تجارتي لارې پرانستل شي.