د چين او پاکستان کلکه ملګرتيا

 سيد عبدالله هارون 
  د پاکستان او چين اړيکې تل مثالي او دوامداره دي. چين نه يوازې د پاکستان نزدې ګاونډي دے بلکې يو کلک او باوري  ورور هم دے چې په هره سخته شيبه کښې د پاکستان تر څنګ ولاړ دے. نن يو ځل بيا چين د خپلو کړنو او پاليسيو له لارې ثابته کړې چې د پاکستان د سوکالۍ، ثبات او پرمختګ ريښتينے ملاتړے دے.
چين په ځانګړي ډول د خيبر پښتونخوا له خلکو سره نزدې اړيکې ټينګولو ته ليواله دے ترڅو د CPEC په څير د لويو پروژو ميوې په مستقيم ډول د دې سيمې خلکو ته ورسيږي. چين غواړي د پاکستان اقتصاد په چټکۍ سره وده وکړي او هيواد په سياسي لحاظ مضبوط شي، ځکه چې اقتصادي پياوړتيا د  امن او سوله ايز راتلونکي ضمانت  دے .
چين تل ټينګار کړے چې د پاکستان او افغانستان اړيکې بايد ښې شي ترڅو CPEC افغانستان او منځنۍ آسيا هيوادونو ته وغځول شي. په  دې  دوران کښې، چين د ترهګرۍ ټول ډولونه په کلکه غندلي دي . چين روښانه دريځ لري چې د هيڅ هيواد خاوره بايد د ترهګرۍ يا خوندي پټو ځايونو لپاره ونه کارولے شي.
چين د ترهګرۍ په  وړاندې جګړه کښې د پاکستاني ځواکونو لخوا ورکړل شوو لويو قربانيو ته درناوے کوي او باور لري چې د پاکستان پوځ په سيمه کښې د سولې په رامينځته کولو کښې کليدي رول لوبولے دے. چين دا هم باور لري چې د نړۍ هيوادونه بايد په جګړو کښې د ښکيل کيدو په ځاے د خپلو اقتصادونو ښه کولو ته توجه  وکړي. له همدې کبله چين د پاکستان اقتصاد د چټک پرمختګ په لاره اچولو لپاره ټول  ممکنه کوششونه  کوي چې د ښو نتيجو طمع ترې کيدلے شي

 
بې له شکه ويل کيدے شي چې د چين او پاکستان اړيکې د وخت په هر ازميښت  کښې کامياب  ختلي  دي او دا ورورګلوي اړيکه به په راتلونکو وختونو کښې د دواړو هيوادونو د پرمختګ او سوکالۍ ته دوام ورکړي.