دعمران خان رهايۍ پورې به زمونږ تحريک روان وي، علي امين ګنډاپور

دخېبرپښتونخوا وزيراعلى  سردار علي امين ګنډاپور وئيلي دي چې نن پۀ  پينځم اګست به دپاکستان دتاريخ ترټولو لويه ريلي ويستل کيږي، ريلي به درنګ روډ نه شروع کيږي اؤ قلعه بالاحصار باندې ختميږي، څوک چې په دې احتجاج کښې شامل نۀ شي  هغه به دنورو په غلامان جوړولو کښې شامل وي، تاسو راوځئ، څه چې کيږي اؤ څنګه کيږي هغه به وروسته ګورو

  دپي ټي ائي دپينځم  اګست احتجاج په حواله خصوصي پيغام کښې وزيراعلى وئيلي  دي چې  پينځم اګست  زمونږ دتحريک دعروج ورځ مقرر ده، په دې ورځ مونږ ته خپل دازادۍ تحريک لوړې کچې ته رسول دي، هرهاغه شخص چې دعمران خان اؤ حقيقي ازادۍ دتحريک سره دے، په دې کښې دې شامل شي.

علي امين ګنډاپور وئيلي دي چې  تاسو ټولو ته راوتل اؤ خپل احتجاج ريکارډ کول دي، هره ضلع، هر کلي، هر تحصيل اؤ دهر  کلي خلقو ته بهر راوتل دي، تاسو ته په بهر راوتلو سره ثابتول دي چې  تاسو دعمران خان اؤ حقيقي ازادۍ سره يئ، دا تحريک به تر هاغه وخته جاري ساتو ترڅو چې عمران خان رها کړے شوے نۀ وي، ترڅو چې مونږ ته حقيقي ازادي نۀ وي ترلاسه شوې،

 دخېبرپښتونخوا وزيراعلى وئيلي دي چې دپښتونخوا عوام چې ترڅو راونۀ اوځي ، عمران خان به رها کولے نۀ شي، مافيا په ظلم قائمولو سره مونږ قيد کړي يو. دۀ ووئيل دحيات اباد ټول پلازې نه به زۀ پخپله دريلۍ قيادت کووم.

علي امين ګنډاپور ووئيل انشاء الله دا ريلي به دپاکستان دتاريخ ترټولو لويه ريلي وي، ستاسو تعلق چې دهرې علاقې سره وي، په رنګ روډ احتجاج ريکارډ کړئ، ټولې دنيا ته وئيل دي چې مونږ دعمران خان سره يو، دا تحريک به په پينځم اګست شروع کيږي اؤ ترڅو چې عمرا خان رها کړے شوے نۀ وي، ترهغې به روان وي.

دۀ ووئيل چې  ازادي کله هم په کور کښې کښيناستلو سره نۀ ترلاسه کيږي، تاسو ته به راوتل وي، تاسو ته به راوړاندې کيدل وي، خپل غږ به پورته کول وي، تاسو ته به ددې خبرې نه راوتل وي چې څه به کيږي. دۀ ووئيل زمونږ ايمان دے چې کوشش  مونږ ته کول دي فيصله الله پاک ته کول دي،