دعوامو دمرضۍ خلاف مسلط شوې اپريشنې نۀ قبلوو، ميا افتخار

پېښور،نوښار( وحدت خبريال، پ ر) دعوامي نيشنل پارټۍ خېبرپښتونخوا صدر ميا افتخار حسين وئيلي دي چې  باجوړ کښې دعوامو دمرضۍ خلاف يوځل بيا دسر په تلي اپريشن اغاز شوے دے، ميا افتخار حسين وئيلي دي چې دريوو ورځو لپاره  شپاړسو يونين کونسلو کښې دسحر پينځوو نه ماښام پينځوو بجو پورې سختې پابندۍ لګول شويدي اؤ دعوامو په کورونو کښې  محصور کولو سره دطاقت په زور دا اپريشن مسلط کولے شي، همدا حالات تيراه اؤ په نورو ضم شوو ضلعو کښې هم دعوامو دمرضۍ خلاف خپلولے شي، دا اقدام ائيني، جمهوري اؤ دانساني حقونو ډاګيزه خلاف ورزي ده.

ميا افتخار حسين وئيلي دي چې دقبائيلي ضلعو مشرانو، علمائے کرامو، تاجر ورورولۍ اؤ سياسي قائدينو په متحد کيدو سره  دا تش په نوم اپريشنې مسترد کړيدي، بازارونه ئې بند کړي اؤ دپرامنه احتجاج دلارې ئې خپله رائے ورکړې ده.  خو دطاقت په نشه کښې مست عناصر دعوامو دغږ اوريدو لپاره تيار نۀ دي.

ميا افتخار حسين وئيلي دي چې  ددهشت ګردۍ اؤ بدامنۍ اصل جرړه استيبلشمنټ اؤ  دمرکزي اؤ صوبائي حکومتونو هاغه  پاليسۍ دي کومې چې دپښتنو علاقې  دجنګ مستقل ميدان جوړ کړے دے. کله چې عوام  بيا بيا دا وائي چې هغوي ته امن، ترقي اؤ دژوند حق پکار دے نو په دوي توپې مسلط کول  دعوامو په خواهشاتو پسې ټوقه ده. دۀ وئيلي دي چې  دښه اؤ بد دهشت ګرد پاليسۍ ملک اؤ قوم ته نۀ راسرکيدونکے  نقصان رسولے دے. دهشت ګرد، دهشت ګرد وي، ددۀ کوم رنګ، نسل نۀ وي، کله چې په ملک کښې بدامني خورونکي بيډ دهشت ګرد  په ډاګه ګرځي نو د ګوډ دهشت ګرد تصور نۀ صرف خندنے دے بلکې دملک سلامتۍ لپاره سنګينه خطره ده.