مونږ دشمني اؤ جنګ نۀ غواړو، دملا يعقوب پاکستان ته پيغام

کابل( ميډيا رپورټ) د اسلامي امارت دفاع وزير مولوي محمد يعقوب مجاهد ويلي، اسلامي امارت د جګړې پيلونکے نه دے او کابل د شخړو پراختيا نه غوړي. مجاهد طلوع‌نيوز سره په خبرو کښې د پاکستان خلقو، علماوو او سياستوالو ته ويلي چې د افغانستان خلق هم د جګړې غوښتونکي نه دي او غوره ګڼي چې ستونزې د خبرو او تفاهم له لارې حل شي. د ملي دفاع وزير، مولوي محمد يعقوب مجاهد ويلي: «زما پيغام د پاکستان علماوو، خلقو او سياستوالو ته دا دے چې د افغانستان له خلقو او حکومت سره جګړه مه کوئ. مونږ دښمني نه غواړو او غواړو ټولې ستونزې د خبرو له لارې حل شي. هغوي دې خپل پوځي رژيم قانع کړي چې له يو ملت سره جګړه نه د دوي په ګټه ده او نه هم د هېڅ لوري لپاره کومه ګټه لري.» هغه ويلي: «د پاکستان د فوځي رژيم تګلاره دا ده چې په افغانستان کښې يو کمزوري حکومت وي؛ داسې حکومت چې پوځي ځواک ونه لري او اقتصاد ئې د پاکستان پر بندرونو متکي وي، څو هر وخت وغواړي له دې لارې د فشار د وسيلې په توګه کار واخلي.» هغه له هېوادوالو هم وغوښتل چې خپل يووالي وساتي او ويې ويل چې  پاکستان سره د کړکېچ زياتوالي افغانان لا يو موټي کړي دي. د ملي دفاع وزير وويل: «زما مشوره افغانانو ته دا ده چې يووالے او اتفاق ولري. بايد هغو کسانو ته فرصت ورنه کړل شي چې په افغانستان کښې د ناامنۍ په لټه کښې دي، څو دښمن زمونږ ترمنځ نفوذ وکړي.» نوموړي د سيمې او نړۍ هېوادونو ته هم په خپل پيغام کښې ويلي، چې د جګړو غوښتونکي نه دي؛ خو که بريد ورباندې وشي؛ نو له ځان څخه نه ستړې کېدونکې دفاع ته چمتو دي.